سعيد آل صمع
وش عاد لك في حبهم
وش تنتظر من قربهم
يا قلب غير دربهم
وانسى عذابك والجراح
لا تعتذر لا تنتظر
انسى وقفل بابهم
وافتح شبابيك الصباح
وابدأ حياتك بانشراح
لا تحرق أرمـوش السحاب
مقسوم لك جمر الغياب
يكفي عنا كافي عذاب
طنّش وقل: ما راح راح
أسلوبهم ما يحتمل
قفل جراحك واعتزل
وشغل همومك بالعمل
من بطل العشق استراح
رعد العواصف والبروق
ما عاد لشراعي تروق
يا ليل من بعدك شروق
صدّت مجاديفي الرياح
البحر في عيونك غريب
والكون في صمتك كئيب
خلاص يا أجمل حبيب
ما عاد لي بعشقك براح
كل الشوارع مقفلة
كل الخطوط محوّلة
ما عاد تفيد الأسئلة
لا تطلبي مني السماح
أنا عطيتك كل شي
تبكي الجروح وتنتشي
ما عاد حلالي أي شي
مليت جدّك والمزاح
ما عاد لي في الحب روح
تقدر تقاوي للجروح
نويت أنا أبعد وأروح
وأنسى عذابك والجراح
